Культурно - этнографический центр
имени И.Я. Танхарова

Сэтинньи ый 1-3 күннэригэр Мэҥэдьэк нэһилиэгин Саһарҕа ыччатын кэнсиэртэрэ Бордоҥ, Чуукаар, Малдьаҕар нэһилиэктэригэр ньиргийдилэр. Сыралаах эрчиллиилэр түмүгүнэн тыыннаах доҕуһуол элбэх дьон сүрэҕин сүүйдэ, истээччилэр үрдүк сыанабылларын ылла.

Бу гастрол кэнсиэртэригэр И.Я. Танхаров аат. КЭК үлэһиттэрин кытары тэбис тэҥҥэ сылдьыспыт “Мөһөөх”, “Бытархай” уонна “Аар Дорҕоон” бөлөхтөр көхтөөх ыччаттара, кыталык кыргыттара барыта холбоон 25 араас нүөмэринэн дьоҥҥо-сэргэҕэ ураты дьоҕурдарын, мааны ырыаларын көрдөрөн, иһитиннэрэн киэһэлэри киэргэттилэр.

Ону таһынан, быстах уһуллубут видеолар куйаар ситиминэн тарҕанан улуус иһинээҕи олохтоохтор хайҕабылларын, махтабылларын туттулар.

Нэһилиэкпит аата үрдүүрүн туһугар кыһаллар ыччаттарбытын, оҕолорбутун ону тэҥэ төрөппүттэрбитигэр махталбытын тиэрдэбит. Ону тэҥэ мааны ыалдьыт гынан сылаас астаах көрсүбүт “Айар Киин” НАДЬ, Е.М. Поликарпов аат. “Эйгэ” уонна Н. Семенов аат. ЦНТлар үлэһиттэригэр махталбыт муҥура суох.